Dy javë më parë qeveria Rama nisi një aksion kundër ndërtimeve pa leje, që u pompua mjaft me dalje në media dhe deklarata të ashpra të kryeministrit, ministrit të Brendshëm Bledi Çuçi dhe zv/kryeministres Belinda Balluku.
Rama u betua se çdo metër katror i ndërtuar pa leje do të shlyhet me gjobë të majme nga ndërtuesit, ose do t’u sekuestrohet dhe do t’i dhurohet Fondit të Banesave Sociale.
Por aksioni duket se është shfryrë që në start, ashtu siç ndodh rëndomtë tashmë me betejat e paralajmëruara të Ramës, me qeverinë që i ka ngecur gozhda në sharrë, pasi i shkoi te dera klientëve të saj të pasur Pllumb Salillari dhe Lul Morina.
E teksa qeveria s’ka këllqe ta shtyjë përpara aksionin, në parkun e Liqenit të Farkës, kryebashkiaku i Tiranës, Erjon Veliaj vijon i pashqetësuar projektin për betonizimin me vila dhe kulla të hapësirës së gjelbër.
I justifikuar me një tabelë ku pretendon se Bashkia po rivitalizon zonën rurale dhe të paprekur deri rreth dy vite më parë nga makineria e betonit, Veliaj i ka dhënë jetë babëzisë së firmave të ndërtimit, të cilave u dhuron leje i pashqetësuar nga forca e ligjit.
Problemin me betonizimin në këtë zonë e ka denoncuar sot me një postim në Facebook edhe Sekretari i Përgjithshëm i Partisë së Lirisë, Tedi Blushi.
Me një video që tregon qartë krimin mjedisor që po kryhet nga Veliaj dhe shpurra e tij mbi Liqenin e Farkës, Blushi nënvizon se “betonizimi, zhdukja e gjelbërimit dhe shkatërrimi i hapësirave publike nëpërmjet babëzisë, paligjshmërisë dhe korrupsionit është i vetmi mision dhe vizion i bandës Rama-Veliaj për Tiranën”.
Postimi i Blushit:
Zhdukja e Parkut të Liqenit të Farkës, “mushkërisë së dytë të Tiranës” është një tjetër krim që Rilindja i ka bërë kryeqytetit. Një prej zonave më të mrekullueshme dhe më të gjelbërta të Tiranës, e dalluar për trashëgiminë e pasur natyrore, për biodidersitetin dhe peisazhin tërheqës, po shkatërrohet barbarisht. Një resort gjigand po ndërtohet aty në vend të pemëve dhe “pyllit orbital”.
Shikoni pamjet dhe gjykojeni vetë se çfarë masakre po ndodh 9.6 km nga qendra e Tiranës dhe vetëm 2.3 km nga rruga nacionale, dhe se çfarë propagandon paturpësisht Erjon Veliaj në materialet që vetë i filmon dhe më pas u servir mediave për një kryeqytet imagjinar të gjelbëruar që në fakt nuk ekziston!
Ka ardhur koha që Tirana t’i tregojë vendin bandës Rama-Veliaj dhe babëzisë së tyre që nuk ka fund.
