Të paktën 11 punonjës të fabrikës së këpucëve në Fushë-Krujë janë helmuar. Ata janë dërguar në spital me simptoma të tilla, si: vjellje, marrje mendsh dhe gjendje të fikti. Sipas policisë, dyshohet se shkaktar i helmimit të punonjësve është bërë aspirimi jo i mirë dhe lëndët e përdorura gjatë procesit të punës.
Informacioni paraprak nga Policia
Sot, më dt 31.05.2017 , rreth orës 09:00, në Spitalin e qytetit Fushë Krujë janë paraqitur 11 shtetase me komplikacione shëndetësore(marrje mendsh, gjendje të fikti), të cilat janë punonjëse të fabrikës së këpucëve në Fushë Krujë. Shtetaset e mësipërme gjatë orarit të punës në fabrikë, nuk janë ndier mirë. Menjëherë janë dërguar në Qendrën Shëndetësore Fushë-Krujë dhe ndodhen nën kujdesin e mjekëve, jashtë rrezikut për jetën. Nga hetimet paraprake dyshohet se shkak ka qenë aspirimi jo i mirë dhe efektet negative të çliruara nga lënda e parë e punës. Policia në bashkëpunim me Prokurorinë e Rrethit Gjyqësor Krujë dhe Inspektoriatin e Mjedisit, po kryejnë të gjitha veprimet e duhura për përcaktimin e shkakut dhe zbardhjen e plotë të ngjarjes.
