Nga Boldnews.al
Çdo familje shqiptare paguan 100 lekë në muaj në faturën e dritave për Radio Televizionin Shqiptar. Megjithëse teknologjia ka avancuar, ku televizorët janë bërë inteligjentë dhe me to mund të shohësh edhe platforma me pagesë shqiptarë dhe ndërkombëtarë, sërish shqiptarët e paguajnë taksën pavarësisht se ndoshta nuk shohin asnjë sekondë të programacionit të RTSH. Por, paratë vërshojnë “lumë” për RTSH-në, teksa po synohet që të përmirësohet një program OTT, që po synojnë ta bëjnë të gjitha platformat dhe televizionet në vendin tonë.
Por, shikoni dhe lexoni pak kostot! Disa vite më parë, RTSH bëri një tender për blerje shërbimi OTT me një vlerë 85 milionë lekë të rinj. Ndërkohë, OTT-ja e RTSH-së funksionon njësoj se ajo e televizioneve të tjera, madje mund të aksesohet lirisht nga çdokush që e shkarkon. Por, jo për drejtuesit e RTSH!
Këta të fundit, në vend që të ulnin kostot e mirëmbajtjes, i dyfishojnë ato. Po, po! Nga vlera prej 85 milionë lekësh që e blenë si program, drejtori i RTSH-së, Enkelejd Joti, ka akorduar një shumë prej 169 milionë lekësh për shërbimin e OTT-së.
Por, a nuk është funksionale OTT-j? A nuk është e aksesueshme?! Natyrisht që teknologjia avancon dhe duhet të mirëmbahet. Por të paktën kostoja e mirëmbajtjes të jetë sa 10 apo 20% e vlerës së blerjes së produktit. Jo sa 200 % e vlerës së tij. Një abuzim i madh, por që për drejtorët e rinj duket se është normale.
Paraardhësi i Jotit bëri një tender sa gjysma e vlerës dhe përfundoi në burg për favorizime. Ndërkohë, që Joti bën tender me objekt “për shërbimin e platformës OTT për RTSH-në”, ndërsa do të blejë pajisje multimedia, infrastruktura e rrjetit etj.
Në kohën e Gëllçit, RTSH-ja bëri një tender me objekt “blerje shërbimi për platformën “OTT” me fond limit 85.113.600 lekë të reja. Në atë kohë, në tender mori pjesë vetëm një kompani që ofroi një shifër sa 99.7% e fondit limit të tenderit. Dhe, duke qenë e vetme në garë, kompania në fjalë nuk e ka pasur fare të vështirë të fitojë çdo qindarkë të akorduar nga RTSH-ja.
