Kreu i Partisë së Lirisë, Ilir Meta ditën e sotme ka zhvilluar homazhe nderimi tek përkujtimorja e liderit të Lëvizjes Studentore Azem Hajdari.
Në përfundim të homazheve gjatë një deklarate për mediat, Meta hodhi akuza mbi qeverinë duke thënë se numri i ulët i regjistrimit të nxënësve e tregon më së miri se shpopullimi është në nivele alarmante. Në fund Meta ka theksuar se vetëm me protesta mund të rivendoset demokracia.
“Është një detyrim për të qenë sot këtu dhe për të kujtuar liderin e lëvizjes studentore të dhjetorit ‘90, frymëzuesin dhe guximtarin e jashtëzakonshëm Azem Hajdarin për atë lidership aq frymëzues që tregoi në kohët më të errëta duke frymëzuar shpresë dhe besim në atë përmbysje që ndodhi falë protestës dhe qëndresës së studentëve, por dhe gjithë qytetarëve të tjerë që rrëzuan edhe murin e Tiranës ashtu si ishte rrëzuar më parë ai i Berlinit. Ndaj sot, ky nderim për Azem Hajdarin, për këtë tribun të lëvizjes së dhjetorit dhe lëvizjes demokratike ka rëndësi të madhe sepse si asnjëherë tjetër në këto 32 vite janë vënë në diskutim arritjet më të mëdha të demokracisë, të lirisë, të të drejtave të njeriut, por dhe vetë ekzistenca e kombit tonë.
Mjafton të shohim sot në ditën e parë të shkollës, numrin e nxënësve që janë regjistruar në raport me disa vite më parë, për të kuptuar se kemi një kërcënim serioz për ekzistencën dhe të ardhmen e shtetit tonë dhe të kombit tonë që vjen pikërisht nga degradimi i vlerave të demokracisë dhe të lirisë në këtë vend dhe nga rrëzimi i sistemit të llogaridhënies përmes një grushti shteti me procedura dhe me ligje dhe vendime antikushtetuese”, tha Meta.
Kjo e hënë 12 shtatori shënon nisjen e viti shkollor 2022-2023, ku 29 mijë vogëlushë ulen për herë të parë në bankat e shkollës, 4 % më pak se vitin e kaluar.
