Kryeministri Edi Rama ka reaguar sërish për sulmin kibernetik që për më shumë se 24 orë krijoi kaos dhe radhë të gjata në të gjitha pikat kufitare të Shqipërisë.
Gjatë një postimi në twitter, kreu i qeverisë e krahasoi këtë sulm të Iranit njësoj si një hajdut që të futet në shtëpi por siç thekson Rama agresori nuk ka arritur të vjedhë të dhënat e qytetarëve.
“Sistemet e pikave kufitare janë në punë qysh prej mëngjesit të sotëm. Përtej ndjesisë së rëndë që krijon penetrimi në këto sisteme, njësoj si kur të hyjnë në shtëpi e të vjedhin, fakti është se agresioni nuk ia ka arritur asfare qëllimit, asnjë zhudkje a rrjedhje serioze të dhënash!
Dhe përtej cinizmit e përqeshjeve tipike të klubit të madh të thashethemeve digjitale, ushqyer nga ulëritës profesionistë dhe kinse strategë marrëdhëniesh ndërkombëtare, Shqipëria teknikisht ka rezistuar më së miri, ndërsa politikisht ka bërë një investim tejet të dobishëm!”, shkruan Rama.
Vendi ynë prej dy ditësh ka rënë pre e goditjeve kibernetike duke krijuar radhë të gjata në pikat kufitare. Sulmi kibernetik pas të cilit sipas kryeministrit Edi Rama fshihet sërish Irani.
