Deputetja e Partisë Demokratike, Dhurata Çupi ka denoncuar gjendjen e mjerueshme të shkollave në vend, një ditë para hapjes së tyre.
Çupi ka postuar në FB, pamjet e një shkolle në Klos teksa ka thënë se qeveria i ka lënë shkollat të degradojnë dhe nxënësit të largohen.
“Mjerimi dhe shkretimi i shkollave. Nesër ata pak nxënës që kanë mbetur në fshatrat e Klosit do të shkojnë në shkolla, të cilat ke frikë t’i shohësh në video, jo më të bësh mësim atje. Pamjet flasin sa 1 mijë fjalë. Qeveria nuk ka vënë dorë për vitë me radhë, duke i lënë shkollat të degradojnë dhe nxënësit të largohen, bashkë me prindërit e tyre”, shkruan ndër të tjerash deputetja demokrate.
Çupi shprehet se gjendja sa vjen dhe përkeqësohet dhe se shpopullimi i vendit është krimi më i madh i kësaj qeverie.
“Gjendja është alarmante dhe vazhdon të përkeqësohet vit pas viti. Shpopullimi masiv i Matit, Klosit, dhe i zonave të tjera të Veriut përmes mjerimit, braktisjes, diskriminimit është politikë antikombëtare dhe krimi më i madh i kësaj qeverie”, e mbyll postimin e saj deputetja demokrate.
