Gazetarja Anduena Llabani, ka bërë një deklaratë të fortë, duke thënë se i shumëkërkuari, Ervis Martinaj është larguar me makinë policie pas ngjarjes së ndodhur në zonën e ish-Bllokut në vitin 2018 në kryeqytet, ku mbeti i vrarë Fabiol Gaxha.
E ftuar në “Euronews Albania”, Llabani u shpreh se Martinaj u jepte hua biznesmenëve të ndërtimit në Tiranë dhe Vlorë.
“E dini që në ngjarjen e bllokut, Ervis Martinaj është larguar me makinë policie? Ervis Martinaj nuk luante vetëm lojëra fati, xhironte miliona para se jepte hua, ua jepte biznesmenëve që merren me ndërtime në Tiranë. Këtë informacion Gledis Nano e ka pasur. Nuk mundet që një njeri i vetëm, pavarësish frymës që mund të ketë, ta bëjë i vetëm. Ka dhe informacion që drejtues të lartë të policisë, merrnin para për të gjithë drogën që hynte dhe dilte nga Porti i Durrësit”, theksoi ajo.
Mbrëmjen e 4 tetorit 2018 në një lokal në ish-Bllok gjatë një përplasjeje me armë mbeti i vrarë Fabiol Gaxha, ndërsa u plagosën Ervis Martinaj dhe Elion Hato.
Gjykata e Tiranës shpalli fajtor dhe dënoi r me 5.6 vite burg Ervis Martinajn. Por për shkak të gjykimit të shkurtuar ai përfitoi uljen e 1/3-ës së dënimit duke u dënuar përfundimisht nga Shkalla e Parë me 3.8 vite burg.
