Nga Boldnews.al
Çdo mbrëmje, dhjetra kamionë depozitojnë tonelata me dhera dhe inerte në landfillin privat, në Sharrë të Tiranës, i cili nuk ka leje për depozitimin dhe trajtimin e mbetjeve ndërtimore.
Në Gusht të vitit 2021, ish-ministri i Turizmit, Blendi Klosi, miratoi leje mjedisore të Tipit A për kompaninë koncensionare të landfillit të Sharrës, “Integrated Energy BV”.
Në atë leje, Klosi kujdesej të saktësonte që nga kjo leje përjashtohej depozitimi i inerteve.
Një vendim i tillë u forcua më tej nga ministrja aktuale e Turizmit, Mirela Kumbaro.
Në Prill 2022, ajo refuzoi kërkesën e kompanisë së themeluar nga biznesmeni në kërkim, Klodian Zoto, për t’u pajisur me leje për depozitimin e inerteve, pasi nuk plotësonte një seri kushtesh dhe kriteresh.
Në fillim të këtij muaji, kompania koncesionare shpalli njoftimin për “Konsultim Publik” pikërisht për projektin e saj për depozitimin e inerteve në landfill.
Të gjithë të dhënat dëshmojnë se “Integrated Energy BV” nuk ka leje për depozitimin e inerteve.
Megjithatë, siç u deklarua në punimet e Komisionit Hetimor Parlamentar për inceneratorët, kompania private siguron miliona euro nga kompanitë e ndërtimit, të cilat janë të detyruara që të depozitojnë mbetjet inerte në këtë landfill.
Një ndryshim i vitit 2020 në ligjin “Për planifikimin dhe zhvillimin e territorit” parashikon që shpenzimet e prishjes dhe pastrimit të inerteve mbulohen nga subjekti zhvillues dhe në të kundërt konfiskohen nga të ardhurat e tij.
Faturat për depozitimin e inerteve janë objekt i inspektimeve periodike të strukturave shtetërore dhe një prej kushteve që kompanitë ndërtimore të marrin lejen e shfrytëzimit për objektet e tyre.
Në Tiranë, i vetmi landfill në funksion është ai privat në Sharrë.
Ndaj kompanitë janë të detyruara që të depozitojnë pranë kompanisë së Zotos inertet e krijuara gjatë punimeve të tyre.
Por, ndërkohë që autoritetet shtetërore tregohen skrupuloze me kompanitë private për kontrollin e faturave të depozitimit të inerteve, asnjë prej tyre nuk dëshiron të konstatojë se vetë landfilli i Zotos nuk ka leje mjedisore për trajtimin e këtyre mbetjeve ndërtimore.
