Turku Faruk Fatih Ozer, i cili u arrestua më 30 gusht pasi ishte shpallur në kërkim ndërkombëtar për mashtrim me kriptvaluta doli sot para gjykatës së Elbasanit, që caktoi për të masën e sigurisë “arrest me burg”.
Prokuroria e Elbasanit kërkoi të njëjtën masë për “bossin” e kriptomonedhave Faruk Fatih Ozer, i cili ishte shpallur në kërkim që prej një viti nga Turqia, ndërsa dyshohej që prej asaj kohe fshihej në vendin tonë. Nga ana tjetër, mbrojtja kërkoi mos ekstradimin e Ozer me pretendimin se në Truqi i rrezikohet jeta.
28-vjeçari turk Faruk Ozer, u arrestuar në Himarë 3 ditë më parë, siç bëri me dije policia. Dy persona të tjerë, një banues në Tiranë dhe një në Durrës u shoqëruan gjithashtu për të sqaruar pozitën e tyre në raport me personin e shpallur në kërkim ndërkombëtar.
Hetimet
Sipas prokurorisë: Nga informacioni i dërguar nga Difuzioni i Interpolit rezulton se shtetasi turk, në vitin 2017, ka krijuar një platformë online të quajtur “Thodex” me funksion shkëmbimin e kripto-monedhës. Pasi ka akumuluar afërsisht 2 miliard USD pasuri në asete dixhitale, ky i arrestuar ka mbyllur platformën dhe mediat sociale dhe është larguar nga territori turk më datë 20.04.2021. Për këto arsye, Faruk Fatih Özer është shpallur në kërkim ndërkombëtar me kartelë të kuqe për llogari të Zyrës Qëndrore të Interpol Ankara.
Gjykata Magjistrale Nr.7 e Stambollit Anadollian në Turqi ka caktuar ndaj tij masën e sigurimit “Arrest në burg”, për veprat penale të “Ngritja e orgazinatave me qëllim kryerjen e krimeve” dhe “Mashtrim në rrethana rënduese”. Maksimumi i dënimit të mundshëm për këto vepra është 10 vjet burgim.
Avokatja: Erdhi në Shqipëri si biznesmen
E pranishme në sallën e gjyqit në Elbasan në mbrojtje të turkut Faruk Ozer ishte edhe një avokate bashkëkombëse e tij. Në një dalje për mediat, ajo tha se klienti i saj ishte i pafajshëm dhe se akuzat ndaj tij janë të gënjeshtra.
Ajo shtoi se Ozer erdhi në Shqipëri për të investuar si biznesmen.
“Ai do të jetë në burg për procesin e ekstradimit. Ne do ta apelojmë vendimin. Bëhet fjalë vetëm për politikë. Në mediat shqiptare dhe ato turke thuhen gënjeshtra për akuzat ndaj tij. Ne mund të themi prokuroria e Turqisë dhe institucionet atje thuhet se dëmi është 20 mln dollarë dhe jo 2 miliard dollarë siç thuhet në media. Ai nuk është personi përgjegjës për ato krime që e akuzojnë. Nga 20 mln dollarë dëm, gjysma e tyre i janë kompensuar familjeve. Dhe gjysma e familjeve të dëmtuara i kanë tërhequr pretendimet. Ka arsye politike. Ai erdhi si biznesmen në Shqipëri, erdhi për të investuar”, tha ajo.
