Sekretari i përgjithshëm i NATO-s, Jens Stoltenberg paralajmëroi për “sfidën strategjike” me të cilën përballet Aleanca, si pasojë e ngritjes së infrastrukturës ushtarake ruse në Arktik.
Së bashku me kryeministrin kanadez Justin Trudeau, sekretari i përgjithshëm theksoi se rrugët më të shkurtra që raketat ruse të arrijnë Evropën perëndimore janë përmes rajonit të Arktikut.
“Rusia ka ngritur Komandën e Arktikut, ka hapur qindra baza të vjetra e të reja ushtarake, përfshirë fusha ajrore dhe porte në ujëra të thella. Gjithashtu, Rusia po e përdor rajonin në fjalë si territor për të testuar armatimet e reja të saj”, tha kreu i NATO-s.
Tradicionalisht, Kanadaja ka qenë në dijeni të pranisë së Rusisë në rajonet e Arktikut, por kryeministri Trudeau tha se situata gjeopolitike ka ndryshuar pas pushtimit të Ukrainës.
“Është me rëndësi të njohim ndryshimin e realitetit gjeopolitik me të cilin po përballet bota dhe nevojën që vendet e NATO-s të investojnë më shumë në kapacitetet e tyre për të siguruar territorin edhe përtej Arktikut”, u shpreh Trudeau.
Kjo është hera e parë në historinë e NATO-s që një sekretar i përgjithshëm viziton territorin arktik të Kanadasë.
Stoltenberg shprehu gjithashtu shqetësimin për bashkëpunimin mes Kinës dhe Rusisë për dërgimin e mjeteve eksploruese në rajonin e acartë.
