Kiev, Ukrainë – Këtë të premte, autoritetet filluan shpërndarjen e tabletave të jodit për banorët pranë termocentralit bërthamor në Zaporizhzhia të Ukrainës në rast të një rrjedhje rrezatimi, mes frikës në rritje se luftimet përreth kompleksit mund të shkaktojnë një katastrofë.
Kjo masë u mor një ditë pasi uzina doli përkohësisht jashtë shërbimit për shkak të asaj që zyrtarët thanë se ishte dëmtim nga zjarri në një linjë transmetimi.
Incidenti rriti frikën për një katastrofë bërthamore në një vend ende të përhumbur nga shpërthimi i vitit 1986 në Çernobil.
Bombardime të vazhdueshme u raportuan në zonë gjatë natës dhe imazhet satelitore nga Planet Labs tregonin zjarre që digjeshin rreth kompleksit – centralit bërthamor më të madh në Evropë – gjatë disa ditëve të fundit.
Tabletat e jodit, të cilat ndihmojnë në bllokimin e përthithjes së jodit radioaktiv nga gjëndra tiroide në rast të një aksidenti bërthamor, u dhanë në qytetin Zaporizhzhia të kontrolluar nga Ukraina, rreth 45 kilometra larg nga uzina. Një grua dhe vajza e saj e vogël ishin mes atyre që morën pilulat.
Agjencia e energjisë atomike e OKB-së është përpjekur të dërgojë një ekip për të inspektuar dhe ndihmuar në sigurimin e centralit.
Zyrtarët thanë se përgatitjet për udhëtimin ishin duke u zhvilluar, por mbetet e paqartë se kur mund të ndodhë.
Uzina e Zaporizhzhias është pushtuar nga forcat ruse dhe drejtohet nga punonjësit ukrainas që në ditët e para të luftës 6-mujore.
Të dyja palët e kanë akuzuar në mënyrë të përsëritur njëra-tjetrën për bombardimet rrotull këtij objekti.
Në incidentin e së enjtes, Ukraina dhe Rusia fajësuan njëra-tjetrën për dëmtimin e linjës së transmetimit që e shkëputi termocentralin nga rrjeti elektrik.
Nuk u mësua saktësisht se çfarë shkoi keq, por Presidenti ukrainas Volodymr Zelenskyy tha se gjeneratorët rezervë të urgjencës së uzinës duhej të ishin aktivizuar për të furnizuar me energji elektrike dhe vënë në funksionim. Impianti kërkon energji që të punojnë sistemet jetike të ftohjes së reaktorëve. Mungesa e ftohjes mund të çojë në një shkrirje bërthamore.
Ukrenergo, operatori i sistemit të transmetimit të Ukrainës, njoftoi të premten se dy linja kryesore të dëmtuara që furnizonin centralin me energji elektrike ë kishin rifilluar funksionimin, duke siguruar një furnizim të qëndrueshëm me energji elektrike.
Agjencia e energjisë bërthamore e vendit, Energoatom, tha se centrali ishte rilidhur me rrjetin dhe po prodhonte energji elektrike “për nevojat e Ukrainës”. “Punonjësit bërthamorë të termocentralit Zaporizhzhia janë heronj të vërtetë! Ata mbajnë pa u lodhur dhe me vendosmëri mbi supet e tyre, sigurinë bërthamore dhe rrezatimin radioaktiv për Ukrainën dhe të gjithë Evropën”, tha agjencia në një deklaratë.
