Shqiptarët po sjellin gjithmonë e më pak fëmijë në jetë, duke ndikuar kështu në plakjen e shpejtë të popullsisë.
Projeksionet e Kombeve të Bashkuara e rendisin vendin tonë të 10 në botë, por të fundit në rajon për nga rënia e popullsisë e cila deri në vitin 2050 pritet të bjerë me 14%.
Bullgaria është në krye të listës për nga rënia e popullisë, e pasuar nga Ukraina, Letonia, Lituania, Serbia, Kroacia dhe Bosnje-Hercegovina.
“Është një fenomen global. Ne jemi në 10 vendet e para që kemi plakje të shpejtë të popullsisë, kemi të bëjmë me njerëz që vënë në rend të parë interesin personal , duan më shumë karrierë, para, sukses, më pak vramendje, telashe, sepse sjellja e një fëmije në jetë ka reperkursionet e veta, ekonomike”, thotë sociologu Gëzim Tushi.
Instituti i Statistikave në raportin e tij të fundit mbi lindshmërinë ka nxjerrë në pah rënien me 14.8% të lindjeve në 3-mujorin e dytë të 2022. Por cilat janë shkaqet që shqiptarët po lindin më pak?
“Shkaqet kulturore që kanë të bëjnë me emancipimin e familjes, familja sot moderne shqiptare s’ka lindjen e fëmijëve prioritet, ka të tjera, siç janë karriera, paraja, suksesi. Është emacipuar femra, lindin sipas një koncepti të caktura. Sot nuk lindin fëmijë në mënyrë aksidentale, lindin të planifikuar. Dhe faktori ekonomik”.
Raporti i lindshmërisë në Shqipëri ka ardhur në rënie të ndjeshme, nga 6 fëmijë për grua në vitet ‘60, me 2,3 fëmijë për grua në vitin 89 dhe 1, 3 fëmijë për grua në ditët e sotme.
/Tv Klan/
