Autoriteti Kombëtar i Ushqimit njofton bllokimin dhe tërheqjen nga tregu të një akulloreje të importuar nga Maqedonia e Veriut.
Kjo masë është ndërmarrë për shkak se në të është konstatuar prani e 2-kloretanolit, e dëmshme për shëndetin, ndërsa u bëhet thirrje konsumatorëve që të mos e konsumojnë atë.
“Referuar njoftimit të ardhur nga sistemi RASFF (Sistemi i njoftimit të menjëhershëm për ushqimin), pas analizave laboratorike të kryera në Francë është konstatuar prani e 2-kloretanolit në akullore me vanilje A H-D GELATO ALLA VANIGLIA CON NOCI DI MACADAMIA 400 g, LOT: 80423 me datë skadence 8.4.2023.
Autoriteti Kombëtar i Ushqimit ka ndërmarrë të gjitha masat e nevojshme nëpërmjet kontrolleve zyrtare në operatorët e biznesit ushqimor për identifikimin, bllokimin dhe tërheqjen e produktit. Në bashkëpunim me operatorët e biznesit ushqimor, janë kryer njoftimet paraprake dhe thirrja për konsumatorët që e kanë blerë këtë produkt, të mos e konsumojnë atë, por ta kthejnë pranë subjektit ku e kanë blerë”, njofton AKU.
