Presidenti i Komitetit Olimpik Kombëtar Shqiptar, Fidel Ylli, gjatë pritjes së modelistët së artë në 3000 metra Luiza Gega, tha se medalistët e artë në vendin tonë marrin shpërblim 100 mijë dollarë.
Ai shtoi se ne jemi ndër vendet me shpërblimet me të larta dhe se shumë sportistë nga vendet e tjera po vijnë në vendin tonë.
“Bullgaria e ka 30 mijë dollarë shpërblimin për kampionët që marrin medalje të artë. Shqipëria e ka 100 mijë dollarë shpërblimin. Prandaj po vijnë edhe sportistë nga Italia dhe nga vendet e lindjes për të përfaqësuar vendin tonë sepse jemi një 3 nga vendet me shpërblimet më të larta elitare. Janë gjëra që në 100 vite nuk janë bërë”, tha ai.
Po kështu, kërkoi rilegalizimin e basteve sportive.
“Unë jam i pakënaqur përsëri. Do të lutesha zoti kryeministër, nxirri nga errësira kompanitë e basteve që po gëlojnë. Që me ato para të bëjmë një qendër tjetër olimpike. Për të bërë dhe shumë qytete të tjera të Shqipërisë. Ne nuk mund të kërkojmë lëmoshë të buxhetit të shtetit. Unë kam qenë në parlament dhe e di si ndahet buxheti i shtetit. Por ne kërkojmë burime të tjera alternative që i merr sot errësira. U bë mirë që u mbyllën sepse kam qenë në parlament dhe e kam votuar. Ishin bërë si kërpurdha pas shiut. Por ka ardhur një moment që duhet bërë një studim. Kompani bastesh ka e gjithë bota e qytetëruar. Po ne kaq të pasur jemi që i lëmë këto para në rrugë. Ne nuk mund të rrimë me atë pallat sporti që kemi sot. Duhet bërë një pallat modern. Duhet bërë fusha olimpike në të gjithë Shqipërinë dhe ju do shikoni në fund të vitit tjetër se çfarë efekti do të ketë”, tha Fidel Ylli.
