Përgjatë dy muajve të parë të këtij viti, 480 shtetas shqiptarë kanë kërkuar azil në Holandë, edhe pse shanset që kërkesa t’i pranohej janë praktikisht zero. Burime nga Ministria e Brendshme holandeze i thanë transmetuesit publik NOS se numri i sirianëve që kanë aplikuar për statusin e refugjatit në Holandë ka rënë nga 5.000 në muaj që ishte përpara, në vetëm disa qindra, transmeton Tch.
Sidoqoftë, thotë NOS, nëse përfshihen dhe të afërmit e mbërritur për bashkime familjare, atëherë sirianët vazhdojnë të mbeten grupi më i madh në këtë kategori.
Zeki Shehu, i Këshillit Koordinator në Holandë, tha për median në fjalë se shumë shqiptare nuk e bëjnë fare dallimin mes azilit dhe emigracionit. “Ata thjesht duan të punojnë”, u shpreh ai.
Që prej fillimit të marsit, qeveria holandeze i ka përshpejtuar procedurat e menaxhimit të kërkesave nga personat e vendeve të treta të sigurta, me qëllimin që kthimi i tyre mbrapsht të bëhet sa më shpejt.
Në janar, Holanda arriti një marrëveshje me autoritetet shqiptare për deportimin në grupe të mëdha të shtetasve të paligjshëm shqiptarë me avionë të posaçëm.
Por deri më tani, thotë NOS, fluturime të tilla nuk ka pasur. Shqiptarëve që pranojnë të kthehen vullnetarisht u jepet një biletë avioni dhe 200 euro. Këtë skemë brenda tre muajsh e kanë ndjekur 385 vetë.
