Ambasada amerikane ka reaguar pas lënies së mandatit nga Armando Prenga, i akuzuar për plagosje dhe vepra të tjera penale dhe madje i dënuar.
Ambasada iu bën thirrje qytetarëve të tregohen vigjilentë dhe të parandalojnë kriminelët nga kandidimi në zgjedhjet e 18 qershorit.
“Ambasada e SHBA mirëpret largimin e ish-deputetit Armando Prenga nga parlamenti. Personat me dosje penale nuk kanë vend në parlamentin, gjykatat, qeverinë, apo bashkitë e një vendi anëtar të NATO-s i cili gjithashtu synon t’i bashkohet BE-së. Inkurajojmë qytetarët shqiptarë dhe institucionet shqiptare të jenë vigjilentë për parandalimin e kriminelëve nga kandidimi në zgjedhjet e 18 qershorit. Shqiptarët meritojnë të kenë një sistem politik dhe gjyqësor të pastër, pa ndikimin e krimit të organizuar dhe korrupsionit”, shprehet SHBA.
