Presidenti i Shqipërisë Bajram Begaj ka reaguar për ngjarjen në uzinën e Gramshit.
Në një postim në rrjetet sociale, Begaj thotë se ngjarjen në uzinën e Gramshit po e ndjek me shumë vëmendje.
Ai shton se është në komunikim të vazhdueshëm me strukturat e sigurisë, Shtabin e Përgjithshëm të Forcave të Armatosura, strukturat e shërbimeve informative dhe ato ligjzbatuese, të cilat i inkurajon dhe mbështet për të vazhduar punën për zbardhjen e plotë të ngjarjes dhe parandalimin e çdo situate që cënon sigurinë kombëtare.
Ai shpreh mirënjohje për dy efektivët e Forcave të Armatosura, të cilëve u uron shërim të shpejtë.
Dy rusë dhe një ukrainas tentuan të hyjnë në uzinën e ushtarake të Gramsh, duke plagosur dy ushtarët që i ndaluan, njoftoi Ministria e Mbrojtjes mbrëmjen e të shtunës, 20 gusht.
“Tre shtetas me pasaporta ruse dhe ukrainase u përpoqën të hynin në fabrikë në qytetin qendror të Shqipërisë, Gramsh. Menjëherë kanë reaguar oficerët që ruanin fabrikën, por gjatë përpjekjeve për ndalimin e tre shtetasve të huaj mbetën të plagosur dy ushtarë tanë”, tha Ministria duke sqaruar se tre autorët janë arrestuar.
Sipas Ministrisë së Mbrojtjes, 24-vjeçari rus i identifikuar me inicialet M.Z. ka hyrë në ambientet e fabrikës dhe ka tentuar të bëjë foto.
Pasi u pikas, ai përdori spraj ndaj ushtarëve për të shpëtuar. Më pas ai u arrestua.
Dy autorët e tjerë, një 33-vjeçare ruse e identifikuar me inicialet S.T dhe një 25-vjeçar ukrainas me iniciale F.A u arrestuan gjithashtu.
Dy ushtarët shqiptarë u dërguan në spitalin e Traumës, pasi kishin lënduar sytë.
Kryeministri Edi Rama tha se këta tre persona “dyshohen për spiunazh”.
Policia Ushtarake, Inteligjenca dhe Antiterrorizmi kanë shkuar në vendngjarje për të zbardhur ngjarjen.
Në të kaluarën kjo fabrikë prodhonte pushkën ruse AK-47. Tani, sipas Ministrisë së Mbrojtjes, përdoret për të çmontuar armët e vjetra.
Shqipëria është anëtare e NATO-s që nga viti 2009.
