Presidenti ukrainas Volodymyr Zelensky u bëri thirrje ukrainasve që të jenë të kujdesshëm përpara festimeve të mërkurën të 31-vjetorit të pavarësisë së vendit nga Bashkimi Sovjetik.
“Ne duhet të luftojmë për fitoren e Ukrainës, mbetet shumë për të bërë, duhet të qëndrojmë të vendosur dhe të durojmë shumë më tepër, për fat të keq shumë dhimbje”, tha Zelensky në fjalimin e tij të përditshëm të mbrëmjes të shtunën.
Ukraina feston Ditën e Pavarësisë më 24 gusht, gjashtë muaj nga pushtimi rus i vendit.
Zelenksy paralajmëroi se forcat ruse mund të përfitojnë nga ngjarja për të nisur sulme veçanërisht të dhunshme.
“Të gjithë ne duhet të dimë se këtë javë Rusia mund të përpiqet të bëjë diçka veçanërisht të keqe, diçka veçanërisht të egër”, nënvizoi presidenti ukrainas.
“Po ashtu edhe armiku ynë. Tashmë çdo javë të dytë për gjysmë viti Rusia po bën diçka të neveritshme dhe të tmerrshme”, shtoi ai.
“Ora policore në qytetin e dytë më të madh të Ukrainës, Kharkiv, do të jetë në fuqi gjatë gjithë ditës të mërkurën”, tha guvernatori rajonal Oleh Sinehub.
Zakonisht në qytet, një objektiv i shpeshtë i bombardimeve ruse, zbatohet një shtetrrethim nga ora 10 e natës deri në 6 të mëngjesit.
Në fjalimin e tij, Zelensky iu referua në mënyrë indirekte edhe serisë së shpërthimeve që kanë ndodhur ditët e fundit në Krime, gadishulli ukrainas i aneksuar nga Rusia në vitin 2014.
Ukraina nuk ka marrë përgjegjësinë për to, por analistët besojnë se të paktën disa prej tyre u mundësuan nga pajisjet e reja të marra nga forcat ukrainase.
“Ju me të vërtetë e ndjeni Krimenë në ajër këtë vit, (ju ndjeni) se pushtimi atje është vetëm i përkohshëm dhe se Ukraina po kthehet”, theksoi Zelensky.
“Gjithashtu të shtunën, një raketë ruse goditi një zonë banimi në një qytet jugor të Ukrainës, jo larg një centrali bërthamor, duke plagosur 14 civilë”, thanë zyrtarët rusë dhe ukrainas.
Sulmi pranë termocentralit bërthamor Pyvdenukrainsk dhe bombardimet e reja pranë termocentralit bërthamor Zaporizhia, më i madhi në Evropë, ngrenë shqetësime për një aksident, thanë zyrtarët ukrainas.
Shtëpitë dhe një ndërtesë apartamentesh pesëkatëshe u dëmtuan në Voznesensk, rreth 30 kilometra nga stacioni i Pivdenukrainsk, i dyti më i madh në Ukrainë, dhe katër fëmijë ishin në mesin e të plagosurve, sipas Guvernatorit të Mykolaiv Oblast, Vitaly Kim.
Sulmi në Voznesensk “është një tjetër akt i terrorizmit bërthamor rus”, tha agjencia shtetërore e Ukrainës Energoatom, e cila menaxhon katër termocentralet bërthamore të Ukrainës.
“Është e mundur që kjo raketë të ketë synuar në mënyrë specifike stacionin Pivdenukrainsk, të cilin ushtria ruse u përpoq ta kapte në fillim të marsit”, shtoi ai.
Në të njëjtën kohë, Rusia dhe Ukraina shkëmbyen sërish akuza në lidhje me termocentralin bërthamor në Zaporizhia, i cili është nën kontrollin e forcave ruse që nga marsi.
Vladimir Rogov, një zyrtar i emëruar nga Moska në qytetin e afërt Enerhodar, tha se forcat ukrainase ndërmorën të paktën katër sulme kundër stacionit.
Nga ana e tij, Yevgeny Getushenko, kryebashkiaku i Nikopolit, i cili mbetet nën kontrollin ukrainas, tha se forcat ruse kishin bombarduar në mënyrë të përsëritur qytetin, i vendosur rreth 50 kilometra në jugperëndim të Zaporizhias.
