Qeveria ka arritur të përfitojë nga taksat 395 milionë euro më shumë se një vit më parë, duke vendosur një rekord të dekadës së fundit sa i takon nivelit të rritjes së të ardhurave në këtë periudhë.
Peshën kryesore në rritjen e parave në buxhet që vijnë nga taksat e mban TVSH-ja, taksë e cila vendoset në përqindje duke u ndikuar drejtpërdrejt nga rritja e çmimeve të ushqimeve dhe karburanteve.
Të ardhurat nga tatimi mbi vlerën e shtuar ishin 205 milionë euro më shumë se në periudhën janar-korrik 2021.
Edhe taksat e tjera që i vendosen lëndëve djegëse janë në rritje krahasuar me një vit më parë, por më pak se plani i qeverisë, duke treguar për një rënie të konsumit të popullatës gjatë muajve të fundit.
Të ardhurat nga akciza rezultuan 8.7% më pak se plani, dhe taksat kombëtare 2.4% më pak se plani.
Qeveria ka qenë e shtrënguar në nivelin e shpenzimeve, duke përdorur vetëm 2.65 miliardë euro nga buxheti çka ka rezultuar që buxheti në fund të korrikut të rezultojë me 135 milionë euro suficit.
