Gjykata e Apelit të Posaçëm lë të pandryshuar masën e sigurisë “arrest shtëpie” për gjyqtaren e Elbasanit te akuzuar për “korrupsion” Zamira Vyshka. Gjyqtarja e dyshuar ka mohuar akuzën duke pretenduar se hetimi ndaj saj është i montuar.
Njëkohësisht Apeli la në fuqi masën “arrest në shtëpi” për të dyshuarin Andrea Tirana dhe masën “arrest në burg” për Ilir Pashaj, Taulant Ramollarin dhe Xhulio Musën.
Nga hetimet e kryera janë ngritur dyshime se gjyqtarja Vyshka dhe avokati Ilir Pashaj, në tetor të vitit të kaluar i kanë kërkuar lekë familjarëve të një personi të arrestuar për vjedhje me qëllim lehtësimin e dënimit penal.
Hetimet dhe përgjimet e kryera për këtë çështje kanë motivuar Gjykatën e Posaçme që të vendosë në mungesë masën e sigurisë arrest shtëpie për gjyqtaren Zamira Vyshka dhe masën arrest me burg për avokatin Ilir Pashaj. Arrest me burg është vendosur edhe për dy familjarë të të dënuarit, ndërsa një i tretë është lënë arrest shtëpie.
