Shtypi i Barcelonës ka shpërthyer sot në indinjatë lidhur me vendimet e arbitrit Jesus Gil Manzano në ndeshjen mes Villarreal dhe Real Madrid.
Sipas gazetave sportive katalanase, ekipi i tyre e bëri detyrën duke fituar ndaj Atletico Madrid, por kjo nuk shërbeu për të marrë kryesimin, pasi Reali fitoi me përmbysje.
Gazeta “L’ Esportiu” hapet me titullin “Kundër të gjithëve” dhe shkruan se skuadra madrilene u favorizua nga arbitri. “Barcelona doli më e fortë nga “Vicente Calderon”, por nuk mori vendin e parë, pasi Reali përmbysi rezultatin falë ndihmës së arbitrit”, shkruan gazeta duke iu referuar 11-metërshit që lejoi Ronaldon të barazonte rezultatin në 2-2.
Kurse “Mundo Deportivo” hapet me titullin “Goditje ndaj kampionatit”, duke shpjeguar se arbitri Gil Manzano është shkaku që katalanasit nuk fjetën në vend të parë.
“Sport” flet për “Përmbysje me vjedhje”, duke iu referuar fitores 3-2 që arriti Reali i Madridit në transfertën e vështirë ndaj Villarrealit.
