Nga Boldnews.al
Në fillim të muajit gusht 2022, qeveria doli me një njoftim zyrtar për dhënien me koncesion të segmentit Milot-Fier, si pjesë e korridorit Blu apo me emërtime të tjera. Në atë mbledhje, ministrja tha se projekti synon një investim mbi 1 miliardë euro, ndërsa do të shkurtonte distancat nga veriu në jug. Por, çfarë punësh do të kryhen?! Dhe, çfarë përmbante kontrata koncesionare?
Natyrisht, kleçka qendron te shkresat, pasi ato përpilohen për ti ardhur në ndihmë firmave dhe jo shtetit. Disa javë pas asaj mbledhje, Ministria e Infrastrukturës dhe Energjisë ka publikuar njoftimet e dhënies me koncesion të tre akseve.
Më saktësisht, dhënia me koncesion e segmentit rrugor “Lekaj-Konjat-Fier”, dhënia me koncesion e segmentit “Kashar-Pezë-Lekaj” dhe segmentit “Milot – Thumanë”. Pra, të 3 akeseve.
Boldnews.al hulumtoi dokumentet e tenderëve që ka publikuar vetë ministria e Ballukut, ku vihet re se kohëzgjatja e koncesionit është plot 35 vite. Në dokumente shkruhet se objekti i koncesionit është “projektim, ndërtim, operim, mirëmbajtje, rehabilitim dhe transferim i segmentit rrugor…”. Pra, për të tria koncesionet, Milot-thumanë, Kashar-Pezë-Lekaj dhe Lekaj-Fier. Redaksia jonë hulumtoi dokumentet e këtyre koncesioneve, ku rezulton se dy nga tre rrugët që do jepen me koncesion janë të bëra.
Shikojeni pak me vëmendje hartën e rrugës Milot – Thumanë. Rruga, e gjatë 13.5 kilometra ka përfunduar së ndërtuari vite më parë dhe është në gjendje të mirë. Ajo është ndërtuara me paratë e shqiptarëve, ndërsa ka edhe korsi emergjencash. Përpos disa ndërhyrjeve për rregullimin e trafikndarëseve, rruga ka edhe një shtresë asfaltike shumë të mirë, ndërsa në të mund të udhëtosh edhe me shpejtësi shumë të madhe, pa cënuar përdoruesit e tjerë. Pra, një rrugë e përfunduar, por që çuditërisht po jepet me koncesion. Për çfarë?! Natyrisht, për të vjelë shqiptarët, apo përduruesit e tjerë, kryesisht shqiptarët e Kosovës apo edhe shtetas të tjerë.
Në dokumente, Ministria e Infrastrukturës shkruan se janë 3 kontrata koncesionare, ndërsa secila kontratë ka edhe një draft, ku detajohet se në këtë aks, pra 13.5 kilometrash, do të vendoset edhe një tra, ku do të bëhet pagesa. Përveç ndërtimit të traut, të gjitha të tjera kanë përfunduar, por shqiptarët po paguajnë sërish!
Segmenti i parë i koncesionit përfundon në Thumanë. Ndërkohë, një koncesion tjetër është dhënë nga Thumana në Kashar, por që nuk përfshin koncesionin e ri. Ai i atëhershmi u anulua fillimisht, por që është riaktivizuar nga Ministria e Ballukut. Ndërkohë, segmenti që do të ndërtohet nga e para e 3 rrugëve të Ramës-Ballukut, është Kashar-Lekaj. Kjo rrugë është e gjatë 33.6 km, ndërsa përfundon në rrugës egzistuese Plepa-Rrogozhinë. Kjo rrugë do të shmangë Durrësin, ndërsa do të kalojë në një gjurmë të re, që përfshin edhe zonën e Pezës. Por, edhe kjo rrugë do të jetë me pagesë.
Segmenti më i gjatë që u dha me koncesion është Lekaj – Fier, e gjatë plot 42.2 kilometra. Fillon në fshatin Lekaj dhe përfundon në fillim të By Passit të Fierit. I gjithë ky segment është i ndërtuar, madje edhe funksional. I vetmi “investim” do të jetë vendosja e një trau që do t’u marrë shqiptarëve paratë. (Vijon…)
(Në shkrimin e radhës do të lexoni: Firmat fituese e kanë të sigurt fitimin, pasi Rama-Balluku i kanë premtuar se përfitojnë edhe nëse nuk kalojnë makinat e parashikuara)
