Gjykata e Vlorës ka vendosur masën e sigurisë “arrest me burg” për ish shefin e Komisariatit Arjan Tasen, i akuzuar për vrasjen e 7-vjeçares Jonada Avdia teksa drejtonte gomonen në plazhin e Potamit në Himarë.
Ndaj tij rëndon akuza ‘vrasje e kryer në formën e dashjes indirekte’ dhe jo ‘vrasja nga pakujdesia’, siç ishte thënë më herët.
Me akuzën e re të ngritur nga organi i akuzës, Tase rrezikon nga 10-20 vite burg, e jo gjobë-5 vite burg siç ishte raportuar më herët.
Në seancë ka folur edhe vetë i akuzuari Tase. Ai ka kërkuar falje familjes të së miturës, si dhe Policisë së Shtetit. Tase ka qenë ish-shef i Policisë në Himarë, ndërsa kur ndodhi ngjarja ai mbante postin e shefit të Policimit në Elbasan.
Ngjarja e rëndë ndodhi më 2 gusht në Plazhin e Potamit. E mitura po lahej në det kur u përplas fillimisht nga pjesa ballore e gomones dhe më pas trupi i saj është prerë nga helikat duke ndërruar jetë në vend.
Fëmija, me origjinë nga Tropoja jetonte me familjen e saj në Angli, por ishte kthyer në atdhe për pushime. Për ngjarjen e rëndë reagoi mbarë opinioi shqiptar, duke protestuar për vdekjen e 7-vjeçares Jonada Avdia.
