“Kemi një politikë që për fat keq mbush Parlamentin dhe shumë institucione të tjera, ku duhet të ketë njerëz me integritet dhe jo njerëz me probleme me të kaluarën kriminale. Ajo që na duhet është energjia pozitive, bashkëpunimi, edukimi më i mirë për të rinjtë tanë, formimi profesional dhe mbrojtja e interesit kombëtar në çdo vendim të rëndësishëm që marrin politikanët”. Kështu u shpreh sot kreu i Lëvizjes Socialiste për Integrim, Ilir Meta, i cili takoi të rinjtë e kësaj force politike në qytetin e Elbasanit.
Duke folur para gjimnazistëve, siç njofton Zyra e Shtypit e LSI-së, Meta shprehu keqardhjen që politika shqiptare vë në diskutim ende zgjedhjet dhe standardet e zgjedhjeve pas 26 vjetësh si një vend anëtar i NATO-s, kandidat për në BE.
Meta në Konventën e Gjimnazistëve të LRI-së në Elbasan, po ashtu shprehu mbështetjen për propozimet për një administrim më transparent, sipas tij, të Maturës Shtetërore, që proesi të bazohet në meritokraci dhe gjithëpërfshirje.
Sakaq deputetja Monika Kryemadhi dhe Sekretari për Programin në LSI, Edmond Haxhinasto, kërkuan nga gimnazistët e Elbasanit të angazhohen në politikë për të sjellë një energji të re dhe pozitive.
