Qeveria dhe njerëz të afërt me të, qofshin në rolet e gazetarëve apo analistëve, po e trajtojnë ngjarjen e ndodhur në Himarë dy ditë më parë, ku një skaf i drejtuar nga komisari Arjan Tase, i mori jetën një vogëlusheje 7-vjeçare, si një aksident që ndodh kudo në Botë.
Mira Kazhani dhe Dritan Hila, në reagimet e tyre mediatike, janë pozicionuar kundër reagimeve qytetare, duke i qëndruar linjës së shfaqur nga Kryeministri, që më kollaj e ka të konsiderojë vampirë ata që reagojnë, se sa atë komisarin që i mori jetën vogëlushes, Jonida Avdia.
Hila, duke iu referuar ngjarjes tragjike në Himarë, shprehej se “të tilla ndodhin kudo në botë, ndodhin se e tillë është jeta në ujë, nuk ka polic dhe sinjalistikë”
Ndërsa Kazhani në një postim të saj në Facebook shkruante “tragjedi ndodhin kudo, gabime, aksidente, të lajthitur, kriminelë e mendje të sëmura vrasin në Europën e zhvilluar. Në Amerikë, pa u tharë një palë lot, një tjetër i çmendur po projekton një shkollë fëmijësh që të futet me armë”.
Regjisori Kastriot Çipi, duke iu përgjigjur Hilës dhe Kazhanit, po në rrjetet sociale shkruan “nëse ekziston rimishërimi, dua të kthehem si peshkaqen. Për mëngjes të ha Mira Kazhanin, për drekë Dritan Hilën. Pres sugjerime për menunë e darkës”.
