Policia e Elbasanit arrestoi sot 37-vjeçarin Ramiz Mici, i cili akuzohet se mëngjesin e së shtunës masakroi me thikë bashkëjetuesen e tij Jetlira Elezi, me të cilin jetonin së bashku në një banesë në Elbasan.
Pasi kreu krimin e rëndë, Mici u largua gjatë natës, duke lënë viktimën në një pellg gjaku.
Burime bëjnë me dije se ai ka qëndruar për orë të tëra poshtë Përroit të Zaranikës, ku dhe u arrestua nga policia. Pas shoqërimit në komisariat, policia pritet që ta marrë në pyetje Micin, i cili nuk dihet ende nëse ka shfaqur apo jo pendesë për krimin e kryer.
Ngjarja dyshohet se ka ndodhur për shkaqe xhelozie, ndërkohë që çifti disa ditë më parë kishin përfunduar në polici, për shkak se autori i kishte thyer celularin viktimës. Në rrethana ende të paqarta, fati i urdhërit të mbrojtjes për Elezin nuk dihet me saktësi.
Pronarët e banesës thanë se ajo kishte vendosur që të largohej prej aty, por Mici e qëlloi për vdekje në orët e para të mëngjesit të djeshëm.
Ndërkohë policia e Elbasanit, e pyetur nga mediat nëse ka nisur hetim në lidhje me deklaratat për hakmarrje tëtë vëllait të viktimës, është shprehur se kjo çështje do të ndiqetnë vijim.
Sipas tyre prioritet kryesor ishte arrestimi i Micit. Ngjarja mund të trajtohet për akuzën e kanosjes.
Si autori ashtu edhe viktima, kishin fëmijë nga marrëdhëniet e tyre të mëparshme, të cilët nuk ishin në banesë në momentin e krimit.
Njoftimi i policisë për arrestimin e Ramis Micit
Elbasan/Finalizohet operacioni policor i koduar “Zaranika”.
Kapet autori i dyshuar i vrasjes së 37-vjeçares, ndodhur një ditë më parë.
Kapja, nga shërbimet e Komisariatit të Policisë Elbasan, në bashkëpunim me forcat e Posaçme “Shqiponja”.
Shërbimet e Komisariatit të Policisë Elbasan, në bashkëpunim me forcat e Posaçme “Shqiponja”, menjëherë pas ngjarjes së ndodhur një ditë më parë në qytetin e Elbasanit, ku mbeti e vrarë me thikë një 37-vjeçare dhe autori i dyshuar u largua nga vendi i ngjarjes, organizuan punën për kapjen e tij.
Në kuadër të operacionit policor të koduar “Zaranika”, si rezultat i ndjekjes së pandërprerë gjatë gjithë kohës në qytetin e Elbasanit, Cërrikut dhe Kuçovës, si dhe informacioneve të marra në rrugë operative, afër banesës së të afërmve të tij në Elbasan, u bë kapja dhe arrestimi i shtetasit:
-Ramis Mici., 37 vjeç.
Ky shtetas ishte shpallur në kërkim, pasi dyshohet si autori i vrasjes së ndodhur më datë 30.07.2022, në Elbasan, ku, në banesë, u gjet e vrarë me mjet të mprehtë (thikë) shtetasja Jetlira Elezi, 37 vjeçe.
Materialet proceduriale do t’i kalohen Prokurorisë pranë Gjykatës së Rrethit Gjyqësor Elbasan, për veprën penale “Vrasja për shkak të marrëdhënieve familjare”.
37-vjeçarja Jetlira Elezi kishte 6 vite që bashkëjetonte me Micin në një shtëpi që e kishin marrë me qira në lagjen “Skënderbej.”
Ajo ishte nga qyteti i Belshit, dhe kryesisht të dy ishin pa punë të qëndrueshme.
Jetlira Elezi ishte e divorcuar dhe kishte një vajzë edhe autori është i divorcuar dhe ka dy fëmijë.
Abc mësoi se 6 ditë para krimit makabër, Elezi kishte kërkuar urdhër mbrojtje. Burime zyrtare nga prokuroria e Elbasanit i thanë ABC se pesë ditë më parë ata ishin shoqëruar në ambientet e policisë Elbasan, ku ajo kishte denoncuar dhunën e bashkëjetuesit.
Ishte pronari i banesës ai që e gjeti Jetlirën të mbuluar nga gjaku ditën e djeshme.
“Doli ai nga dera, e kishte përplas derën. Kur e pashë ajo kishte rënë përmbys, gjak dynjaja. Kjo ka ndodh nga ora 12.50”, tha ai për mediet.
Shkak i ngjarjes së rëndë dyshohet se ka qenë xhelozia.
