Të tjera ‘përplasje’ zbulohen nga protesta e shoqërisë civile dhe konfrontimi me policinë tek parku i Liqenit Artificial në Tiranë. Një qytetar është kërcënuar nga një punonjës i policisë, i cili po ecte në ambientet e brendshme të Parkut të Liqenit, me një makinë me targa të huaja.
Kërcënimi ka ardhur pasi qytetari ka tentuar ta filmojë dhe menjëherë pasi polici e ka pikasur, ka ndaluar makinën dhe i ka bërë me shenjë që të afrohet.
Ai i ka kërkuar që ta fshijë foton, por kur ka parë që dikush tjetër po e filmonte, ka mbyllur derën e makinës dhe është larguar. Videoja është publikuar nga faqja “Vota e bardhë”.
“Sot në orën 13.30 pak metra larg ullirit të qëndresës te parku i liqenit: Kalon një makinë me targa të huaja, që qarkullonte lirshëm në territorin e brendshëm të parkut, me shofer një punonjës policie. Një qytetari që ishte kalimtar i rastit e ndodhej aty pranë me familjen i bën përshtypje ky fakt dhe i bën një foto. Punonjësi i policisë e vë re, ndalon makinën e i bën thirrje të afrohet. Kur qytetari i afrohet punonjësi i policisë nis ta kërcënojë për mospublikimin e fotos. Në atë çast ndërhyn edhe një nga protestuesit e qëndresës tek ulliri dhe dikush nis të filmojë me celular. Pasi vë re se po filmohet punonjësi i policisë largohet. Kjo është policia represive & abuzive që nuk duam!”, shkruan “Vota e Bardhë”.
