Koncerti i Dua Lipës në Toronto duket se nuk ka shkuar aspak brenda pritshmërive pasi disa fansa të cilët futën fishekzjarre brenda ambienteve ku u mbajt koncerti i kanë ndezur dhe kanë plagosur disa të pranishëm.
Këngëtarja u ngjit në skenë në Scotiabank Arena kur disa fishekzjarre u shpërthyen drejt dyshemesë dhe skenës. Në videon nga incidenti, shihen shpërthime të shumta me ngjyra të ndryshme teksa në skenë po performojnë Dua Lipa dhe balerinët e saj shoqërues.
TMZ raporton se të paktën tre persona kanë pësuar lëndime të lehta, por për fat të mirë, askush nuk ka pasur nevojë të shtrohet në spital. Gjithashtu nuk ka pasur dëmtime në arenë, një fakt fatlum nisur nga mundësia e zjarreve.
Policët po punojnë me stafin e sigurisë në Scotiabank Arena për të shqyrtuar pamjet e sigurisë dhe për të përcaktuar se si u futën fishekzjarrët brenda dhe kush është përgjegjës për ndezjen e tyre.
Dua ende nuk ka reaguar rreth incidentit.
