Tre persona kanë pësuar lëndime trupore në qytetin e Gjilanit pasi një vinç ka rënë mbi veturën me të cilën po udhëtonin, si pasojë e erërave të forta.
Zëdhënësi i Policisë për rajonin e Gjilanit, Ismet Hashani ka thënë për KosovaPress se mbrëmjen e sotme gjithsej katër qytetarë kanë pësuar lëndime dhe se ka pasur dëme të konsiderueshme si pasojë e motit të lig.
Fatmirësisht, Hashani thotë se gjendja shëndetësore e të lënduarve është e qëndrueshme.
Ai ka bërë të ditur se në terren janë angazhuar të gjitha njësitet emergjente, policia, zjarrfikëset, ndihma e shpejtë dhe njësitet e KEDS-it, dhe se për momentin gjendja është e qëndrueshme.
“Deri në këto momente nuk janë raportuar përmbytje dhe të gjitha rrugët janë të qarkullueshme”, ka shtuar ai.
