Në një intervistë në televizonin 6+1 të Vlorës, Kryeministri Edi Rama i ka premtuar qytetarëve ndërtimin e aeroportit të Vlorës. Rama tha se ky aeroport nuk do të jetë vetëm për turizëm, por ndoshta edhe për “cargo”, pra për transporte mallrash. Një projekt i tillë sipas deputetit të Vlorës, që duket se ka nisur fushatën me takime gjatë gjithë ditës, do të ndihmonte në rritjen e ekonomisë së zonës.
Vonesat e projektit të Lungomares, ku punimet e pakujdesshme janë bërë edhe shkak aksidentesh me pasojë vdekjen, Kryeministri i ka justifikuar me kërkesën që ky i fundit ka për cilësinë e ndërtimit.
Arsyeja sepse Rama nuk i jep një datë përfundimi projektit të Lungomares paska qenë supersticioni, siç deklaroi në intervistë.
Por Kryeministri premtoi se është afër konkretizimit marrëveshja me një grup gjigand ndërtimi aeroportesh i cili, edhe nën interesimin e Presidentit turk Erdogan, ka shprehur interes konkret për të ndërtuar një aeroport strategjik në Vlorë.
