Kryetari i Partisë Demokratike Lulzim Basha ka zhvilluar një bashkëbisedim të rinjtë që kanë studiuar jashtë vendit dhe me qytetarët në çadrën e protestës të ngritur përpara godinës së Kryeministrisë.
Bashkë me kreun e opozitës ka qenë tenori i njohur me famë botërore Agim Hushi si dhe artistët Raina Kovaçi e Edmond Zhulali.
“Për Ramën nuk mjaftojnë provat për Armando Prengën sepse e do Parlamentin me plehra. Nuk do asnjë provë për të hequr Zhulalin, Raina Kovaçi, vajzën e Ramiz Kovaçit. Asnjë provë për të përbuzur intelektualët. I vetmi faj i tyre është që nuk i mbushin dot xhepat e Ramës me pare dhe hundën e Ramës me drogë”, tha Basha.
Gjatë fjalës së tij, Basha theksoi se “Republikës së krimit” të Edi Ramës po i vjen fundi dhe është në shtratin e vdekjes.
“Ky është sheshi i vlerave nga i cili po themelojmë Republikën e vlerave. Këto janë ditët e fundit të republikës së krimit. Kjo republikë e turpit sot me urdhër të Edi Ramës vazhdon ta mbajë Armando Prengën deputet, që prej dy vitesh është i akuzuar për plagosje me armë zjarri.
Mbështetja jonë, fuqia jonë janë qytetarët shqiptarë dhe më të mirët e qytetarëve shqiptarë. Fuqia e Edi Ramës janë trafikantët, janë banditët.
Edi Rama e mban Armando Prengën, ky e mban Elvis Rroshin dhe nxjerr banditë të tjerë nga burgu ditë për ditë. Kjo është republika e krimit në shtratin e vdekjes”, theksoi Lulzim Basha.
