Të tjera detaje dalin në dritë nga atentati i mbrëmjes së sotme në Milot ku mbeti i plagosur Ylli Brahimi dhe një person tjetër i identifikuar si Klisman Preçi. Burime bëjnë me dije se në atentatin e sotëm në vendin e ngjarjes janë zbrazur 100 plumba kallashnikovi.
Si Brahimi ashtu edhe Preçi nuk janë emra të panjohur për policinë. Biznesmeni 47-vjeçar Brahimi i ka shpëtuar edhe një atentati të bërë në janar të vitit të shkuar në mes të milotit.
Ngjarja në 2021
Atentatorët e biznesmenit Ylli Brahimi, mbi të cilin u zbrazën plot 20 plumba nga automatiku ‘Scorpions’, në vitin 2021 ndoqën rrugën Tiranë-Milot e më pas u zhdukën drejt Burrelit, pa u ndaluar nga asnjë efektiv policie.
Dy personat, që u shfaqën me ‘Suzuki’ e me maskë në kokë në qendër të Milotit, janë nisur nga Tirana. Kamerat e aeroportit të Rinasit kanë pikasur dy të rinjtë e veshur me ngjyrë blu, që kalojnë pranë tij në drejtim të Milotit.
Pasi mbërrijnë në Milot, të rinjtë qëllojnë biznesmenin Ylli Brahimi, të cilin e kapën plot shtatë plumba në gjymtyrët e poshtme, e më pas u zhdukën.
Edhe pse ngjarja ndodhi në orët e paradites, konkretisht në orën 11:57, dy autorët kanë përshkuar kilometra të tëra rrugë, të pashqetësuar.
Mos ndalimi i tyre nga uniformat blu ka bërë që të rinjtë të mbërrijnë në destinacionin të cilin e kishin paracaktuar për tu fshehur pas krimit, duke lënë pas misterin e identitetit të tyre dhe biznesmenin Ibrahimi të shtrirë në tokë.
Vetë biznesmeni që ra pre e këtij atentati të ndodhur më 13 janar mohoi asokohe të kishte konflikte dhe ishte shprehur se nuk e ka aspak idenë se kush qëndron pas sulmit të organizuar.
