Pasditen e sotme në qendër të Tiranës një person kërcënoi se do të hidhej nga vinçi.
Por pas rreth një ore qëndrimi në vinç personi i identifikuar si ish-i përndjekur Xhemal Zhuri ka zbritur nga lartësia.
61 vjeçari kërcënoi të hidhej nga lartësia për shkak se nuk kishte marrë këstin e radhës për vitet e burgut të kryera gjatë periudhës së diktaturës komuniste.
Ish- drejtori i Arkivit të ministrisë së Brendshme, Kastriot Dervishi publikon një dokument me copëza nga jeta e ish- të përndjekurit të dënuar 3 herë gjatë viteve të komunizmit.
“Një ish i dënuar politik sot u orvat të vetëvritej. Më poshtë po shkruaj pak rreshta nga pjesa e përndjekjes së jetës së tij. Është dënuar tri herë për arsye politike. Fillimisht në vitin 1978 me 8 vjet burgim, për agjitacion e propagandë.
Pas lirimit nga burgu, internohet. Në vitin 1984 dënohet me një vit burgim për largim pa leje nga vendi i internimit. Në vitin 1987 dënohet me 3 vjet heqje lirie, sërish për agjitacion e propagandë.
Në vendimin e fundit, gjykata e deklaroi fajtor duke u shprehur se ai ishte nën ndikimin e “ideologjisë borgjezo-revizioniste”, “kishte mbeturina të së kaluarës”, ishte shkrehur kundër Ramiz Alisë dhe se vepra e tij përbënte “rrezikshmëri shoqërore.
Sigurisht ai është në të drejtën e vet të kërkojë dëmshpërblimin e vuajtjes së burgimit të padrejtë në forma proteste që janë të skajshme dhe të dhimbshme”, shkruan Dervishi.
Në njoftimin e saj për rastin, Policia e Tiranës tha se 61 vjeçari nuk kishte marrë këstin e gjashtë.
Ky vinç është përdorur disa herë nga persona që kanë kërcënuar që të hidheshin nga lartësia për motive të ndryshme.
Agjencia e Pagesave për ish-të përndjekurit politikë, bën me dije se këtij shtetasi i është paguar i 6-të, ndërsa nga data 10 shkurt e këtij viti i është hedhur edhe kësti i 7-të i shumës financiare.
Policia njofton:
Më datë 23.02.2017, rreth orës 16:30, në rrugën “Ibrahim Rrugova”, përballë Kishës Ortodokse, tek një pallat në ndërtim ka hipur në vinç, shtetasi Xh. Zh., 61 vjeç, i cili tenton të hidhet, pasi nuk ka marrë këstin e gjashtë të parave, si i persekutuar politik. Policia në vendin e ngjarjes po negocion për të bërë të mundur zbritjen e tij.
Reagon ministria e Financave
Ministria e Financave: Xhemal Zhuri nuk ka tërhequr këstin e 7-të nga llogaria
Për protestën e ish-të përndjekurit reagoi edhe Ministria e Financave, e cila deklaron se kësti i gjashtë është mbyllur për këtë person dhe se ka filluar procesi për pagesën e këstit të shtatë tek kategoria e “persona ish-të përndjekur politikë që janë në jetë”.
Ministria thotë se kësti i 7-të është hedhur në llogari, porse nuk është tërhequr ende.
“z. Xhemal Zhuri ka përfituar pagesën e këstit të gjashte në datën 07.10.2016. Ndërkohë ne datën 10.02.2017, ne llogarinë e tij personale në bankë, ka kaluar edhe pagesa e Këstit 7, e cila nuk është tërhequr akoma nga personi i tij. Bashkëngjitur mund të gjeni me foto, vërtetimin nga sistemi i pagesave, për këstet e përfituara dhe datat respektive të pagesave”, thuhet në njoftim.
Ministria sqaron se “tek sistemi i Agjencisë së Pagesave, kësti i 7-të, figuron i papaguar për shkak se personi nuk është paraqitur për të tërhequr pagesën nga llogaria e tij në bankë, por kjo pagesë ka kaluar tashmë në llogarinë bankare”
.
