Vatra e zjarrit në fshatin Piraj në Lezhë është arritur të mbahet nën kontroll dhe është shuar tërësisht rreth orës 04:00 të mëngjesit të sotëm.
Dëmet që kanë shkaktuar flakët e zjarrit kanë qenë të konsiderueshme.
Flakët kanë shkrumbuar linjën hekurudhore me një gjatësi prej 1 km, si dhe sipërfaqe të mëdha me pemëtari dhe vreshtari, ndërsa është arritur të shpëtohet kisha e fshatit dhe varrezat, pa shkaktuar dëme të shumta.
Për neutralizimin e flakëve u angazhuan disa zjarrfikëse të ardhura dhe nga bashkitë fqinje.
Gjithashtu janë shuar edhe vatrat e zjarrit në masivin pyjor në dalje të qytetit të Lezhës e përgjatë superstradës Lezhë-Milot. Vatër aktive zjarri mbetet aktualisht ajo në pyjet e Oroshit.
Ditën e sotme është kërkuar ndihma e ushtrisë, ku 50 forca pritet te mbërrijnë në terren për të ndihmuar në shuarjen e kësaj vatre.
