Kryetarja e LSI-së, Monika Kryemadhi bëri me dije këtë të Hënë se në SPAK është depozituar kallëzim edhe për ministren e Financave Delina Ibrahimaj, lidhur me çështjen e inceneratorëve.
Sipas Kryemadhit, Ibrahimaj, me veprimet dhe mosveprimet e saj ka ndikuar në mos hetimin e plotë të krimeve financiare nga administrata tatimore që ajo ka drejtuar në vitin 2018.
“Sot me shtesën e kallëzimit, i kam kërkuar SPAK të hetojë edhe Ministren e Financave, ish Drejtoreshën e Tatimeve, zonjën Ibrahimaj, për implikimin e saj të drejtpërdrejtë me aferën e inceneratorëve, pasi me veprimet dhe mosveprimet e saj ka ndikuar në mos hetimin e plotë të këtyre krimeve financiare nga administrata tatimore që ajo ka drejtuar në vitin 2018. Si përgjigje ndaj këtyre fakteve tronditëse të bëra publike, Ministrja e Financave të qeverisë deklaroi në Kuvend se ata i kanë ditur këto kompani fiktive që në vitin 2018. Mirëpo, edhe kur i kanë hetuar këto kompani fiktive, administrata tatimore ka refuzuar t’i hetojë këto kompani që kanë lëshuar fatura fiktive për të mashtruar shtetin, së bashku me përfituesit real të faturave fiktive. Që janë kompanitë e inceneratorëve, kompania e Klodian Zotos, nënkontraktore e inceneratorëve”, u shpreh Kryemadhi në një deklaratë për mediat.
“Ndaj, sot me shtesën e kallëzimit, i kam kërkuar SPAK të hetojë edhe Ministren e Financave, ish Drejtoreshën e Tatimeve, zonjën Ibrahimaj, për implikimin e saj të drejtpërdrejtë me aferën e inceneratorëve, pasi me veprimet dhe mosveprimet e saj ka ndikuar në mos hetimin e plotë të këtyre krimeve financiare nga administrata tatimore që ajo ka drejtuar në vitin 2018”, shtoi ajo.
Kryemadhi tha se janë në total 3641 faqe dokumentacion që janë depozituar në SPAK, që përfshijnë librat e shitjes dhe të blerjes të 24 kompanive fiktive. Ajo u shpreh se LSI ka evidentuar se kompanitë koncesionare dhe kompanitë fiktive të lidhura me to, kanë kryer të paktën 3 vepra penale: Fshehja e të ardhurave; Mospagimi i Taksave dhe Tatimeve, Pastrimi i Produkteve të veprës penale ose veprimtarisë kriminale.
Kryemadhi deklaroi se dorëheqja e menjëhershme e kryeministrit Edi Rama është më e pakta, siç do të kishte ndodhur në çdo vend normal europian. Por, shtoi, veprimi i shpejtë dhe i plotë i drejtësisë, për të çuar përpara zyrtarët përgjegjës të shkeljeve ligjore të koncesioneve të inceneratorëve, dhe ata përgjegjës për anën financiare të saj, është akoma dhe më i rëndësishëm.
Kryetarja e LSI-së kërkoi hetime edhe veprime nga SPAK edhe për inceneratorin e Tiranës si dhe për Erion Veliajn, Engjël Agaçin e Armando Subashin.
