Ministri i Punëve të Jashtme të Maqedonisë së Veriut, Bujar Osmani ka reaguar pas miratimit të propozimit francez nga Kuvendi.
Në një postim në rrjetet sociale, Osmani shprehet se “mirëpres konkluzionet e sotme të Parlamentit, të cilat pas një debati të gjerë tre ditor, i sugjeruan Qeverisë të miratojë një Draft Kornizë negociuese me qëllim fillimin e negociatave mes Maqedonisë së Veriut dhe BE-së”.
Kryediplomati Osmani nënvizon se “vendi ynë do të vazhdojë në rrugën e integrimit europian me vizionin e të qenit një vend i reformave të mirëfillta europiane dhe një vend i denjë për të jetuar dhe punuar”.
“Qytetarët ndajnë këtë vizion dhe duan të bëhen pjesë e familjes evropiane dhe të kontribuojnë në themelimin e parimeve evropiane, demokracisë, sundimit të ligjit dhe prosperitetit ekonomik”, deklaron ministri Osmani.
