I ftuar në emisionin “Pasdite në Top Channel”, poeti dhe autori Agim Doçi ka rrëfyer një detaj të veçantë për Festivalin e 27-të të Këngës në RTSH.
Ai ka folur konkretisht për fustanin që këngëtarja Parashqevi Simaku mbante veshur në këtë festival.
Sipas Doçit, Parashqevia, e cila konkurronte me këngën “e Duam Lumturinë”, kishte kërkuar me patjetër që të vishte një fustan taftaje me ngjyrë rozë, e për t’ia mundësuar këtë atij ju desh të vidhte perdet e Komitetit Qendror.
“I vetmi vend ku mund ta gjeja ishte Komiteti Qendror. Perdet e Komitetit Qendror ishin bojë rozë. I kam vjedhur dhe me copën në dorë kam shkuar tek rrobaqepësja më e mirë e artistëve, Shpresa Zeraliu, të cilës sa nuk i ra pika kur m’i pa në dorë, sepse i njohu që ishin perdet e Komitet”, ka rrëfyer Doçi.
Nga ana tjetër, i ftuar në panel edhe Pirro Çako ka treguar se si këngëtarja hoqi dorë nga kënga pasi nuk i pëlqeu orkestrimi.
“Parashqevia hoqi dorë nga kënga. Iku sepse nuk i pëlqeu orkestrimi. Të pasnesërmen ishte festivali. Gjergj Lekën ishte i vetmi që pranoi ta riorkestronte këngën për gjatë gjithë natës”, shton Pirro.
Sipas këtyre rrëfimeve vetëm pasi siguroi fustanin me tafta rozë dhe u bind për orkestrimin, Parashqevia pranoi të këndonte këngën, që fitoi çmimin e parë në atë festival.
