Një biznes është mbyllur dhe 11 të tjere janë paralajmeruar në zonen turistike të Shëngjinit, pasi janë konstatuar shkelje përsa i përket sigurisë ushqimore.
Këto veprime janë ndërmarrë nga Autoriteti Kombëtar i Ushqimit, pas 190 inspektimeve të relizuara përgjatë muajit qershor.
Drejtori i AKU-së në Lezhë Besmir Frroku thotë se vemendja maksimale është përqëndruar tek sezoni turistik dhe nuk do të ketë tolerime, ndaj subjekteve që nuk do garantojnë siguri ushqimore.
“Konkretisht gjatë qershorit kemi realizuar rreth 190 inspektime, nga të cilat kemi bërë 11 paralajmërime. Paralajmërimi është bërë për shkelje të vogla të konstatuara. Kemi bërë një mbyllje aktiviteti, pas një indicje të marrë nga komisariati i Lezhës. Kemi vendosur një gjobë në vlerën 3 milion lekë, ku kemi bllokuar dhe produktin që nuk garantonte origjinën nga kishte ardhur, dhe e kemi dërguar për asgjesim,” tha ai.
Autoriteti Kombëtar i Ushqimit në Lezhë bën me dije se do të jetë në teren dhe monitorim të vazhdueshem gjatë gjithë sezonit turistik, për të garantuar siguri ushqimore për pushuesit që kanë zgjedhur bredetin e Lezhës.
