Grupi Parlamentar i Partisë Demokratike i është drejtuar kryetares së Kuvendit Lindita Nikolla, ku i kërkon që të mos zvarritet shqyrtimi i mandatit të Olta Xhaçkës.
Pesë anëtarët demokratë të Këshillit të Rregullores dhe Mandateve i kanë kërkuar kryetares së Kuvendit të mbledhë Këshillin e Rregullores dhe Mandateve, nesër në orën 13:00.
Në kërkesë theksohet se thirrja e Këshillit është e detyrueshme sipas Rregullores së Kuvendit kur e kërkojnë 5 anëtarë të Këshillit.
Kujtojmë që 14 deputetë të PD kanë kërkuar dërgimin në Gjykatën Kushtetuese të mandatit të deputetes Olta Xhaçka për “shkak se ajo ka përfituar, nëpërmjet bashkëshortit të saj, statusin e investitorit strategjik, duke marrë në përdorim pasuri publike. Për demokratët kjo është shkelje e rendë e kushtetutës dhe ligjit, për shkak se deputetit i ndalohet të përfitojë pasuri publike”.
