Kreu demokrat, Sali Berisha, u shpreh sot kundër legalizimit të kanabisit, ashtu sikundër Kryeministri Edi Rama ka paralajmëruar se do të miratojë draftin ligjor.
Berisha tha se duke legalizuar kanabisin, legalizon edhe krimet që lidhen me të. Kreu demokrat tha se miliardat e fituara nga kanabizimi i vendit në 2015, bëri që shqiptarët të marrin në dorë trafikun e drogave të forta, kokainës dhe heroinës, nga vendet e origjinës në drejtim të Europës.
Gjatë bashkëbisedimit me diasporën, Berisha gjithashtu kundërshtoi nismën e Open Balkan, duke e cilësuar atë si një politikë ruse.
Berisha tha se vitin e kaluar, në rrafshin demografik, kemi një kthesë dramatike pasi për herë të parë vendi pati 3300 lindje më pak se vdekje.
Lideri demokrat theksoi se jemi shndërruar në një komb që rrit fëmijë për emigracion, dhe largimi i shqiptarëve vijon dita-ditës.
“Kombi sot është shndërruar në një komb që rrit fëmijë për emigracion, në një kohë kur ju e dini mirë potencialet e jashtëzakonshme që ka Shqipëria si rrallë ndonjë vend tjetër me resurset e saj”, tha Berisha.
Gjithashtu ai u ndal në rritjen e çmimeve në Shqipëri, duke e cilësuar atë si krejtësisht abuzive dhe që po varfëron shqiptarët.
