Deputeti socialist, Taulant Balla ka provokuar sot protestuesit e opozitës, duke e quajtur “birrari” çadrën para kryeministrisë ku ata po qëndrojnë prej të shtunës.
“Protesta e PD është vetëm e një klani brenda PD-së, pasi pjesa tjetër nuk e ka miratuar këtë “birrari”, tha Balla në një prononcim për mediat pranë Kryesisë së Kuvendit.
Por në maj 2010 Taulant Balla ishte një ndër deputetët e PS që për të protestuar kundër qeverisë, u ngujuan në çadrat që opozita e asaj kohe ngriti po përpara kryeministrisë.
Por në atë kohë, Balla mendonte se greva e urisë, që zgjati 19 ditë, ishte në shërbim të demokracisë.
“Do të jemi këtu deri në ditën që së bashku me miq e shok këtu brenda, të arrijmë objektivin e përbashkët që është një objektiv në shërbim të demokracisë. Greva e urisë është një element po aq demokratik sa ç’do element tjetër. Por sigurisht kjo është një grevë që nuk ka ndodhur asnjëherë tjetër, as në Shqipëri e as në ndonjë vend tjetër evropian të paktën. Kjo për shkak se këtu ndodh një grevë urie për demokraci. Ka ndodhur një në 1991 në Shqipëri dhe atëherë pati një sukses, ju garantoj që kjo grevë urie do të ketë po aq sukses”.