Ministri për Evropën dhe Punët e Jashtme, Ferit Hoxha, ka reaguar përmes një postimi në rrjetin social X lidhur me imazhet e publikuara nga ministri izraelit Itamar Ben-Gvir, që sipas tij tregojnë trajtim poshtërues ndaj aktivistëve të ndaluar të flotiljes.
Hoxha i cilësoi pamjet si “tronditëse dhe të papranueshme”.
Në reagimin e tij, ministri bëri të ditur se ka udhëzuar Ambasadën e Shqipërisë në Tel Aviv të mbajë kontakte dhe koordinim të ngushtë me autoritetet izraelite.
Ben-Gvir ka ndarë një video në llogarinë e tij në rrjetin social amerikan X, që tregon forcat izraelite të sigurisë duke keqtrajtuar aktivistët në portin Ashdod, ku ata po mbahen, video e cila ka shkaktuar reagime të shumta.
Trajtimi çnjerëzor i aktivistëve të Flotiljes Globale Sumud, të cilët u ndaluan nga Izraeli në ujërat ndërkombëtare, ka shkaktuar reagime nga vende të shumta, përfshirë shumë vende anëtare të Bashkimit Evropian (BE).
Në mesin e aktivistëve të ndaluar është edhe një aktivist shqiptar.
Reagimi:
‘Imazhet e ndara nga Ministri Itamar Ben-Gvir që tregojnë trajtimin poshtërues të aktivistëve të ndaluar të #flotiljes janë tronditëse dhe të papranueshme. Të gjithë personat e ndaluar duhet të trajtohen me dinjitet dhe në respekt të plotë të të drejtave të njeriut, ligjit ndërkombëtar dhe ligjit humanitar”
“Kam udhëzuar Ambasadën tonë në Tel Aviv që të mbetet në kontakt dhe koordinim të ngushtë me autoritetet izraelite në mënyrë që të sigurohet që qytetarëve tanë t’u ofrohet ndihma e duhur konsullore, sipas nevojës dhe në përputhje të plotë me ligjin ndërkombëtar”, është shprehur Hoxha.
The images shared by Minister Itamar Ben-Gvir showing the humiliating treatment of detained #flotilla activists are shocking and unacceptable.
All persons detained must be treated with dignity and in full respect of human rights, international law, and humanitarian law.
I have…
— Ferit Hoxha🇦🇱 (@HoxhaFer) May 21, 2026
