Numri i rasteve të dyshuara të virusit Ebola në Republikën Demokratike të Kongos dhe Ugandë është rritur në 600, nga të cilat ka patur 139 vdekje.
Komiteti i Emergjencave të OBSH-së u takua në Gjenevë të mërkurën, ku Drejtori i Përgjithshëm Tedros Adhanom Ghebreyesus konfirmoi para gazetarëve se virusi mbetet një emergjencë e shëndetit publik me shqetësim ndërkombëtar, por jo një emergjencë pandemike.
“OBSH e vlerëson rrezikun e epidemisë si të lartë në nivel kombëtar dhe rajonal dhe të ulët në nivel global”, tha Tedros.
Shifrat e mëparshme të raportuara nga zyrtarët e RDK-së ishin rreth 131 vdekje nga 513 raste të dyshuara. Shpërthimi ka lindur vetëm pesë muaj pasi RDK shpalli përfundimin e epidemisë së saj të mëparshme. Shefi i emergjencave të OBSH-së, Chikwe Ihekweazu tha në të njëjtën konferencë shtypi se prioriteti absolut i organizatës tani është identifikimi i të gjithë zinxhirëve ekzistues të transmetimit.
“Kjo më pas do të na mundësojë të përcaktojmë vërtet shkallën e shpërthimit dhe të jemi në gjendje të ofrojmë kujdes,” tha Ihekweazu.
Tedros shpalli për herë të parë emergjencën të dielën dhe tha se e kishte bërë këtë pa u konsultuar me ekspertë të tjerë për shkak të urgjencës së situatës. Autoritetet shëndetësore thonë se shpërthimi po nxitet nga lloji Bundibugyo, një lloj virusi Ebola për të cilin nuk ekziston asnjë vaksinë ose trajtim. Nga 600 rastet e dyshuara, OBSH tha se 51 ishin konfirmuar në provincat veriore të RDK-së, Ituri dhe Kivu të Veriut. Uganda ka konfirmuar gjithashtu dy raste në Kampala, duke përfshirë një vdekje, nga dy persona që udhëtuan nga RDK në Uganda. Një misionar mjekësor që u infektua me Ebola në RDK po transportohet gjithashtu në Gjermani për trajtim.
