Ish-ministri i Kulturës i Francës, Jack Lang, ka dhënë dorëheqjen nga posti i presidentit të Institutit të Botës Arabe, pas publikimit të dokumenteve që hedhin dritë mbi lidhjet e tij financiare me financierin e ndjerë Jeffrey Epstein, i dënuar për abuzime seksuale.
Dorëheqja vjen pasi Prokuroria Financiare e Francës hapi një hetim ndaj Lang dhe vajzës së tij, Caroline Lang, me dyshimin për “mashtrim të rënduar tatimor”.
Sipas dokumenteve të publikuara më 30 janar nga Departamenti i Drejtësisë i SHBA-së, emri i Jack Lang përmendet mbi 600 herë në dosjet që përfshijnë shkëmbime mes tij dhe Epstein gjatë një periudhe shtatëvjeçare, deri në vdekjen e këtij të fundit në paraburgim në vitin 2019.
Ndërkohë, Caroline Lang, ish-ekzekutive e Warner Bros France, dha dorëheqjen nga posti i drejtoreshës menaxhuese të Sindikatës së Prodhuesve të Pavarur të Francës, pas publikimit të dokumenteve që zbulojnë marrëdhënien e saj të biznesit me Epstein.
