Të paktën 6 persona kanë humbur jetën pas shembjes së një ndërtese të vjetër banimi në qytetin e Tripolit, në veri të Liban.
Sipas agjencisë shtetërore të lajmeve, ndërtesa u shemb në lagjen Bab al-Tabbaneh, një nga zonat më të varfra të qytetit. Autoritetet evakuuan menjëherë ndërtesat përreth, për shkak të rrezikut të shembjeve të tjera.
Nga rrënojat janë nxjerrë pesë viktima, mes tyre një fëmijë dhe një grua e moshuar, ndërsa tetë persona të tjerë janë shpëtuar. Shefi i mbrojtjes civile, Imad Khreish, deklaroi se ndërtesa përbëhej nga dy blloqe me nga gjashtë apartamente secili.
Pamjet e publikuara nga mediat lokale tregojnë banorë dhe ekipe shpëtimi që përpiqen të largojnë rrënojat me mjete të thjeshta dhe me duar.
Presidenti Joseph Aoun urdhëroi mobilizimin e të gjitha shërbimeve të emergjencës për operacionet e kërkim-shpëtimit dhe për sigurimin e strehimit për familjet e prekura.
Libani përballet prej vitesh me problematikën e ndërtesave të amortizuara dhe të ndërtuara pa leje, veçanërisht gjatë periudhës së luftës civile 1975–1990. Situata është përkeqësuar nga kriza e rëndë ekonomike, që ka kufizuar mundësinë e banorëve për riparime apo zhvendosje në banesa më të sigurta.
Organizata Amnesty International ka paralajmëruar më herët se mijëra persona në Tripoli jetojnë në ndërtesa të pasigurta dhe ka kërkuar vlerësim urgjent të sigurisë së objekteve në të gjithë vendin.
