Misioni i ODIHR në Shqipëri ka kërkuar sot përmirësimin e ligjit zgjedhor në vend.
Gjatë një takimi në kuadër të Ditës Botërore të Zgjedhjeve, përfaqësuesi Michel Tarran tha se legjislacioni aktual ka ende probleme që duhet të adresohen.
Ai shtoi se, duke iu referuar rekomandimeve të ODIHR, disa çështje vazhdojnë të mbeten të pazgjidhura.
“Rekomandimet e ODIHR janë për të përmirësuar ligjin e zgjedhjeve, dhe këtu inkurajojmë punën e komisionit për reformën zgjedhore. Shpresojmë shpejt të fillojë punën e tij. Puna e tij është shumë e rëndësishme, sepse ka disa probleme të lidhura me ligjin zgjedhor që sipas nesh nuk është akoma aty ku duhet të jetë.
Ky është rekomandim i vazhdueshëm i misionit të ODIHR. Më duket se kësaj here mesazhin e ODIHR e kanë lexuar dhe partitë politike. Sa i përket debatit politik, ne nuk përfshihemi. Por të gjitha partitë politike janë dakord që ligji zgjedhor duhet të ndryshojë”-u shpreh Tarran.
