Gjykata e Lezhës ka caktuar masat e sigurisë për tre personat e arrestuar në lidhje me laboratorin e drogës të zbuluar në një godinë katërkatëshe përgjatë aksit rrugor Lezhë–Milot.
Seanca gjyqësore u zhvillua me dyer të mbyllura dhe zgjati rreth 60 minuta.
Në përfundim, gjykata cilësoi të ligjshëm arrestimin e shtetasve Arben Gjergji, 57 vjeç, dhe Arnold Gjergji, 22 vjeç (babë e bir), duke vendosur ndaj tyre masën e sigurisë “arrest në burg” si autorë të dyshuar të veprimtarisë kriminale.
Ndërkohë, për punonjësin e OSHEE-së, Gjon Doda, gjykata vendosi masën e sigurisë “arrest në shtëpi”, për akuzën e “Shpërdorimit të detyrës”.
Laboratori u zbulua mbrëmjen e së hënës, ku gjatë kontrollit në katin e dytë të objektit u sekuestruan: 8.8 kg lëndë e dyshuar narkotike kanabis (e tharë); 1064 bimë të dyshuara narkotike kanabis; 960 fidanë kanabisi të mbjellë në kubikë; 850 fara kanabisi; 106 llamba me transformator për kultivim; Një armë zjarri automatike me dy krehra me fishekë; Një pistoletë sportive me fishekë; Një automjet dhe katër aparate celularë.
