Nga Boldnews.al
Ksamili është një nga perlat e bregdetit. Por, turistëve që duan të shijojnë bukuritë e tij u duhet të kalojnë një kalvar të gjatë, në trafikun kilometrik në rrugët e ngushta të qytezës.
Qeveria, por edhe Bashkia e Sarandës, kanë premtuar shpesh se janë të angazhuara për të gjetur zgjidhje sa më të mira infrastukturore, me qëllim që të sigurojnë lirshmërinë e trafikut dhe një qarkullim sa më të mirë të automjeteve.
Megjithatë, nga e thëna në të bërë, ka një ndryshim shumë të madh. Bashkia e drejtuar nga Oltion Çaçi, jo vetëm që nuk ka pasur asnjëherë plan të zgjerojë rrugët, por, përkundrazi, me një projekt që nis zbatimin së shpejti, parashikohet ngushtimi i mëtejshëm i akseve rrugore. Duket se origjina e tij nga Beçishti e shtyn kryebashkiakun ta kthej me nostalgji ne udhë dhish edhe Ksamilin dhe Sarandës dhe zonat që ai qeveris si Pasha me ferman nga sulltan Rama.
Në 27 Janar 2026, Bashkia e Sarandës ka shpallur fituesit e tenderit me objekt “Ndërtim trotuare, rikualifikim i rrethimeve anësore në rrugët e brendshme dhe rikualifikim hapësirave shlodhëse, Ksamil”.
Fondi limit për këtë procedurë ishte në vlerën e 75 milionë lekëve të reja (mbi 750 mijë euro). Fitues është shpallur kompania “Shëndelli” shpk, në pronësi të Yzedin Bozhaj, një shoqëri, e cila, për një rastësi perfekte, ka fituar tendera pranë Bashkisë së Sarandës në vlerë mbi 4 milionë euro dhe, të gjitha me “flamur të kuq”.
Çaçi ngushton rrugët e Ksamilit
Tenderi për ndërtimin e trotuareve të Ksamilit është shpallur në nëntor të vitit 2025. Në dokumentat e procedures, të konsultuara nga “Boldnews.al” thuhet se “objekti është një rrugë në Ksamil, e cila është ndërtuar përpara disa viteve dhe është në gjendje ekzistuese mjaft të mirë.Megjithatë është parë e nevojshme zgjerimi i kësaj rruge për shkak të krijimit të korsisë së këmbësorëve”.
Natyrisht, ndërtimi i trotuareve (të cilat në dokumenta citohen si “korsi këmbësorësh) është një zhvillim shumë i mirë për komunitetin dhe turistët.
Por, në pamjet që shoqërojnë dokumentat e tenderit tregohet qartësisht se ndërtimi i trotuareve do të ngushtojë shumë akset rrugore të brendshme të Ksamilit, megjithëse terreni ka hapësirë për të ndërtuar kalimet e këmbësorëve pa cënuar rrugën.
Në dosjen e tenderit janë publikuar disa foto nga gjendja aktuale e akseve rrugore. Nga pamjet e siguruara nga vetë Bashkia e Sarandës, kuptohet lehtësisht se ka hapësira për të ndërtuar trotuare, pa cënuar gjerësinë e rrugës.
Në dy anët e akseve rrugore ka zona me ferra, barishte e godina të dëmtuara, të cilat mund të pastrohen lehtësisht dhe të krijojnë kushtet e favorshme për ndërtimin e trotuareve.
Por, kryebashkiaku Oltion Çaçi dhe Bashkia e tij kanë menduar një variant tjetër, aspak të favorshëm për drejtuesit e mjeteve.
Projekti, sipas asaj që është publikuar nga vetë administrata lokale e Sarandës, parashikon ngushtim të rëndësishëm të akseve rrugore. Sipas projeksioneve të Bashkisë, rrugët, të cilat aktualisht mundësojnë lëvizjen e tre automjeteve njëkohësisht në të dy kahet e rrugës, do të ngushtohen në qarkullimin e dy makinave, nga një për secilin drejtim.
Projekti i ri i Oltion Çaçit pritet të krijojë një efekt hinkë, ku automjetet, jo vetëm që nuk do të kenë lirshmëri në lëvizje, por, me shumë mundësi, do të krijojnë një trafik kilometrik, i cili pritet “t’ua nxijë” akoma më shumë ditët turistike qytetarëve shqiptarë e të huaj që zgjedhin të bëjnë pushimet në qytezën e Ksamilit.
Tender me “flamur të kuq”
Në tenderin për trotuarët e Ksamilit kanë marrë pjesë katër operatorë ekonomikë. Tre prej tyre janë skualifikuar nga Bashkia e Sarandës dhe fitues është shpallur kompania e vetme e mbetur në garë, “Shëndelli” shpk. Ajo ka paraqitur ofertën në shumën 69.9 milionë lekë të reja (rreth 700 mijë euro), e cila rezulton se nuk ishte vlera më e ulët në garë.
Ky nuk është tenderi i parë që Bozhaj dhe kompania e tij “Shëndelli” kanë fituar në mungesë të një gare reale në Bashkinë e Sarandës.
Të dhënat e portalit information “openprocurement.al” tregojnë se “Shëndelli” shpk, si operator i vetëm ose në bashkëpunim me të tjerë, është shpallur fitues i të paktën gjashtë procedurave tenderuese në bashkinë e qytetit jugor.
Në total, fondi limit për këto procedura kalon vlerën e 4 milionë eurove. Në të gjithë rastet, “Shëndelli” rezulton se është shpallur fituese si pjesëmarrëse e vetme në garë ose pasi të gjithë operatorët e tjerë në garë janë skualifikuar.
