Rreth 1,500 banorë të qytetit Niscemi në Siçili janë detyruar të braktisin shtëpitë e tyre pas një rrëshqitjeje masive dheu, e shkaktuar nga reshjet e dendura të sjella nga cikloni Harry.
Stuhia e fuqishme që goditi Italinë jugore javën e kaluar ka krijuar një çarje rreth 4 kilometra të gjatë në një shpat kodre, e cila vazhdon të zgjerohet dhe po kërcënon seriozisht qendrën historike të qytetit.
Kryebashkiaku i Niscemit, Massimiliano Conti, e ka cilësuar situatën si “dramatike” dhe u ka bërë thirrje banorëve që ndodhen jashtë zonave të rrezikut të qëndrojnë në shtëpi dhe të shmangin lëvizjet e panevojshme.
Sipas autoriteteve të Mbrojtjes Civile, të gjitha banesat që ndodhen brenda një rrezeje prej 50 deri në 70 metrash nga zona e çarjes pritet të shemben. Deri më tani nuk raportohet për persona të lënduar, por dëmet materiale janë të konsiderueshme.
Si pasojë e situatës, shkollat janë mbyllur, ndërsa një rrugë kryesore që lidh Niscemin me qytetin bregdetar Gela është bllokuar plotësisht.
Qindra banorë janë strehuar përkohësisht në një palestër sportive lokale, ndërsa të tjerë janë zhvendosur pranë familjarëve.
