Komisioneri për Mbikëqyrjen e Shërbimit Civil, Lefterije Lleshi (Luzi), ka nisur takime konsultative me institucionet dhe bashkitë për unifikimin e procedurave të publikimit të vendeve të lira të punës përmes portalit e-Albania.
Takimet u zhvilluan në Tiranë dhe në to morën pjesë përfaqësues nga bashki dhe institucione qendrore, si dhe nga institucionet e drejtësisë.
Qëllimi i këtyre takimeve është që të gjitha institucionet të ndjekin të njëjtën metodologji për shpalljen e vendeve të lira të punës dhe të shmangen vonesat apo gabimet në publikimin e tyre.
U kërkua që punonjësit e institucioneve që merren me këtë proces të trajnohen për përdorimin e sistemit, në mënyrë që procedurat të zbatohen saktë sipas ligjit për shërbimin civil.
Procesi i publikimit të vendeve të lira të punës në e-Albania do të monitorohet nga Komisioneri për Mbikëqyrjen e Shërbimit Civil dhe së shpejti kjo metodologji do të përdoret edhe për fazat e rekrutimit.
